5.25.2009

ROMA: Latina poesis

[Musei Vaticani Romae "Scalae cochleatim"]

Heri angelus meus Baeticus ad me scripsit breuem dulcemque epistulam atque inter alia scripta has perbellas exhibitiones imaginum Romae annexas misit. Dum optimam causam rationemque Latine scribendi loquendique quaerere pergo (hodie haud optimistam, ut sic dicam, me sentio) his in modernis temporibus pessimis Poesi -etiamsi hac inferiore septimana plus quam centum philologi classici quadam in urbe Baetica conueniamus ad orationes acroasesque (Hispanice) habendas de lingua Latina numerose expressa-, uobiscum, beneuolis rarisque lectoribus lectricibusque qui antiqua Romanorum lingua quoque utimini ad cogitationes uestras exprimendas, partiri uelim haec photographemata, quae meam in mente attulerunt illud iter magicum ad urbem aeternam quod feci nonnullos abhinc annos una cum aliis sodalibus discipulisque:

ROMA Publish at Scribd or explore others: Magazines & Newspape politica italia
Roma, amorem animae meae
concinis. Celebratio
gloriae optima amor mihi est.
Roma-amor, mihi plus vales
Servitudine mundi.

(Tusiani, "Lingua Latina", vv. 21-25)

***

En nonnulli loci Florilegii artis Versificatoriae Cascaliani qui monstrant quomodo grammaticus Hispanus prosodiographos legerit atque excerpta fecerit:

CASCALIVS, "Florilegium artis uersificatoriae" (Valentiae 1640) CASCALIVS, "Florilegium artis uersificatoriae" (Valentiae 1640)


Bookmark and Share

5.10.2009

Praeconium

Quis non se numquam habuit haud uisus uel inuisibilis coram ceteris? Ego persaepe, sed praecipue hac hebdomade superiore. Per deos superos et per naturam a me ueneratam iuro nomen dedisse atque ad VI Conuentum Societatis Studiorum Latinorum (SELat) adituram esse atque adfore! Et quamquam certiorem feci moderatricem de obliuione, nomen tamen meum nondum apparet [iam omnia nomina participum in Conuentu legi possunt hodie, ante diem quartum decimum Kalendas Iunias].

Vt dictum est in commentario superiore, de quodam Florilegio artis uersificatoriae (Valentiae 1640), Francisco Cascalio auctore, acroasem habebo. Hoc in opusculo humanista, qui circa octoginta annos natus iam rude donatus est, modos contexendi uersus uarios dictat quam breuissime, ne uel molestus sit uel auditorem discendi auidum prolixus teneat, iuxta illud Horatianum:

Quidquid praecipies, esto breuis, ut cito dicta
Percipiant animi dociles teneantque fideles.

Nam de uersificatoria non omnia, aliqua tantum quae Cascalio esse magis selecta et peculiaria uideantur, dicat. Cetera ludimagistris, qui non pauci nec pauca praeceperunt, mandat.

Seliguntur enim uersus non solum Vergilii et Horatii et Terentii et Ouidii et Martialis inter alios classicos, sed etiam auctorum saeculorum XV et XVI: Sannazarus, Porcellius, Pontanus, Basinius, Faustus Andrelinus, Euritius Cordus, Eouanus Hessus, Ianus Pannonius,...

Ceterum Florilegium, quod dicatum est poetae eiusque antiquo discipulo Ludouico Celdrán, est opusculum selectissimum librorum DE PROSODIA quos Petrus ab Area Baudoza praeposuit Epithetorum Rauisii Textoris operi, id est, libri III De uersuum conscribendorum uariandorumque ratione et libri IV De figuris poeticis seu a poetis usurpatis necnon De decem uitiis in carmine uitandis ex DESPAVTERIO cum eorum explicatione et De carminibus ad ueterum imitationem artificiose componendis praecepta perutilia a GEORGIO SABINO collecta.

Vtrum hoc Florilegium artis uersificatoriae optimum sit ad uersus Latinos pangendos an non, ego ipsa spero fore ut aliquando experiar quae carmina Latina componere uelim.


Hac quoque septimana superiore Theodericus Sacré quoddam praeconium ad me misit, quod mea fortassis interesset atque etiam aliorum amicorum et collegarum. Et reuera mea interfuit. En uobis praeconium una cum duobus carminibus a me selectis, altero ad nostram amatam "Linguam Latinam", altero pulcherrimo quandam ad Margaritam, poetae uer, concinnato a Iosepho Tusiani, "uel maximo poeta Latino uiuo".

Praeco enim sum dicto oboediens:

"Lingua Latina"

Tu, potens, metuenda, tu
magna et imperiosa, me
reddis ingenuum et pium,
o Latina loquela, tu
lex et ars mihi pura.

Non ducis tonitrum in foro,
simplicem repetis mihi
musicam: attonitum meum
vincis ingenium novae
syllabis pietatis.

Me doces sonitu sacro
arborum fremitus leves
et maris melos intimum,
siderum harmoniam vagam
noctis in patula umbra. (...)



Ad Margaritam

O caelum pluvium, pratum super omne videris
Esse hodie dominus, tam malus atque minax,
Sed me non terres: in mente ac corde habeo ver
Omnino redolens et sine fine meum.
Vim, si vis, totam patefac nebularum et aquarum
Multa cum furia, terribili ac rabie.
Me non terrebis: ver in me natum animam implet,
Securasque rosas a feritate facit.
Nonne Philippinae me reddit amor victorem?
Nonne est Ver dominae veris imago mei?
O pluvium caelum, fac ut vis: me bene servat,
Ac me servabit, dulciter eius amor.

Novi Eboraci, die XXIV Martii MM



5.03.2009

De nouissimis itineribus (et IV): sales selecti

[Aloisius Miraglia orationem habet quodam in conclaui antiquae Vniuersitatis Vrsonensis]
(Preme hic aut hic ad meliora pluraque photographemata uidenda)

Septimana finita est negotiosissima, ut fere semper, eaque de causa usque ad diem hodiernum meum in scriptorium intrare nequiui ad finem nouissimorum itinerum narrandum. Et quamuis plurima ultimis diebus acciderint, omnia breuiter exponam ut neque taediosa sit neque nimis obsoleta uidear.

Hae res selectae uel maximi momenti mihi fuerunt:

Primum, Saturni die XVIII mane, coram tandem noui amicam meam Baeticam, illam solam feminam dulcissimam quacum Latinarum epistularum commercium habeo, quae semper comissima erga me haud merentem mihi donauit mirabile Discum Compactum c.n. "Ave Mundi Luminar" complectens nonnulla cantica Latina cuiusdam auctoris Lusitani. Quam triste simulque perpulchrum est homines gratiores aliquando inuenire in andronibus Retis uirtualis omnium gentium, ut sic dicam, quam ueris in uiis nostrae cotidianae uitae!

[Artifex imaginibus luce exprimendis pessima sum.
Nihilominus ecce Theodericus Sacre orationem habens Vrsone]

Mane plura mirabilia Latina. Iterum audire uolui elegantem orationem Theoderici Sacré De Viuis et Erasmi colloquiis inter se comparatis. Qui, cum me uideret sessam in prioribus sedibus, mihi propinquauit inquiens necesse non esse orationem suam denuo audire: "Aufuge", -salse me rogabat. "Aufuge". Quare enim mea in sede manerem, ille non intellegebat. Quare diceret mihi aufugiendum esse, ego ipsa quoque mente non capiebam, quoniam occasiones Latine audiendi uidendique (Ansgario quoque gratias) de talibus colloquiis et talem oratorem in Hispania minimae sint.

Deinde Aloisius Miraglia induxit quandam Bibliothecam Latinam. Noua enim de libris Orbergianis eiusque methodi complementaria nobis attulit ex. gr. imagines librorum LLPSI coloribus pictas, quoddam libellum Italice conscriptum quo continetur de cultu et humanitate maiorum necnon aliquot adminicula ad paginas librorum Orbergianorum melius intelligendas per se. Quid breui exprimam hoc de uiro mirabili? Melius enim est imagines intueri audireque: ecce uideogrammata mirabilia, pars prima et altera, Carolo Cabanillas auctore, quem quoque illo die noui salutemque dixi, necnon pars prima et altera, Ansgario Legionense auctore.


Vltimus conuentus dies pulchram in Domum Baebiam Saguntinam ingressi sumus comitati Iohanne Vi(ncentio), nostro strenuo Herme Interretiali atque assessore Culturae Classicae Sagunti (CEFIRE), qui nobis monstrauit huius Domus omnes instructissimos angulos cubiculaque per exhibitiones uiuidorum imaginum. Spero fore ut aliquando hanc Domum uisitare ego ipsa possim!

Etiam perambulauimus uirtualiter per Romam et Graeciam antiquam una cum Societate Hispanica Archaelogiae Virtualis quae mense Iunio inferiore celebrabit "Archaelogica 2.0", id est, Primus Conuentus Internationalis Archaeologiae et Artis Computatoriae Graphicae.

Conuentum coronauit comicum spectaculum c.n. "Ahora mismitos" [id est, "Nunc mei_mythoi"/"Nunc iamiam(s)": non fieri potest in linguam Latinam uertere ludum uerborum Hispanicum, saltem ego non ualeo] cuiusdam histrionis salsissimi Antoni Blanco nuncupati qui nonnullas mythologicas fabulas peregit quam facetissime!

video

Omnia enim incohata et finita sunt similiter, id est, salibus plurimis atque etiam cachinnis maximis.

Conuentu enim optime absoluto, nonnullos dies post ab amica Baetica quaesiui quid fuerit id quod magis minusue illi libuerit, utpote quae opinionem nonnulli magistri scire uellem. Respondit haec: "Quamuis omnia colloquia audire nequiui, quod die Veneris lassitudo me vicit et deuersorium petiui quam citissime, utilior mihi visa est oratio a Iosepho García de Paredes habita quae De Graeca antiqua lingua docenda in Graecia praesentis temporis inscribitur, quia didici nonnulla humanitatis in Graecia atque etiam quod magister partitus est munifice indagationes suas de pensionibus studiorum causa et de scholis aestiuis in Graecia [uidete ex. gr. Hellenikon Idyllion]. Etiam libuit explicatio methodi didascalicae ab Aloisio Miraglia habita propter eius declamationem clarissimam". Ecce responsum magistrae dulcissimae doctaeque.

Nihil amplius dicendum superest quam conuentus Vrsonensis instructori Antonio Agamador denuo gratuler necnon his itineribus nouissimis fastigium imponam faciendo breuem mentionem de conuiuio apud sodales Saturni die XVIII noctu habito.

Haec enim fuit secunda concenatio Latina meae uitae, post quam spero plures fore. Nihil de ea addere cupio nisi nomina eorum qui rotunda in mensa sessi fuimus: Iosephus Maria Maestre, Iohannes Cienfuegos, Theodericus Sacre eiusque uxor Ingris, quidam professor Philosophiae, Ludouicus Charlo, Iarcius Gaditanus, iuuenis Rodericus Pintianus et Aloisius Miraglia (inter iuniores -o iuuenta uiribus pollens!- et prope illum mirabilem sessa fui). Concenatio amoenissima fuit simulque maioris ponderis quippe quae animaduerserim quam plurima duraque itinera proeliaque adhuc oppetenda sint ad metam optatam contigendam.

***
Proximum iter mihi faciendum erit ad Beatiam, a die XXVII usque ad diem XXX mensis Maii, id est, ad VI Conuentum Societatis Studiorum Latinorum, ubi philologi classici conueniemus ad orationes et acroases Hispanice habendas de poese poeticaque Latinis. De quo ego loquar? De "Florilegio artis uersificatoriae" composito saeculo XVIIº a quodam grammatico ad discipulos docendos uersus Latinos pangere.

Valete omnes quam salsissime!

***
ADDENDA

Au, Alexandra, tibi est memoria aetate fluxa! Oblita es ueram coronam Conuentus. Nunc omnes iam sciunt te ex Vrsone exiisse et Gades petiuisse post spectaculum comicum. Forte Fortuna paginam ad hoc habemus. Si scire uultis qui in "Mensa Rotunda Vrsonensi" sederint et quae dixerint, premite hic: